代先，愛seng 考過台語認證中高級，chit-má 教育部承認2種單位ê lóng 會當，chi̍t 張是教育部--ê，一張是成大--ê，教育部kap成大ê 考聽講讀寫，只不過教育部認證bōe 倒扣分數，m̄-koh 會考文章寫作;成大認證 ē 倒扣分數(閱讀kap聽力ê部份m̄-tio̍h ē倒扣1/3)，m̄-koh 寫ê 部份 bōe 考文章，ē 考40條羅馬字聽寫(寫全羅，nā-sī 選擇臺羅tō 寫臺羅，選擇白話字tō寫白話字)，詳細ê內容請參考這篇文章:
不管你the̍h-tio̍h tó 一張中高級認證，lóng ē-tàng 有資格去考台語支援教師，chit-má 有分兩種，chi̍t 種是國中小--ê(kan-taⁿ ē-tàng 教國中kap 國小)，chi̍t種是高中--ê(kan-taⁿ ē-tàng 教國中kap高中)，兩種bô-kâng，nā-sī beh 教國小，tō 一定愛考國中小hit張 chiah ē-sái 去教，nā-sī beh 教高中，tō 一定愛考高中hit張。
Nā-sī 有台語認證中高級í-siōng，tō ē-tàng 報名支援教師受訓課程，一般來講，國中小--ê lóng 是報各縣市辦ê 受訓課程，nā-sī 高中ê課程，今年2023年lóng 是線頂報名，ē-tàng 透過Google 搜揣高中支援教師培訓報名，tō 會使揣著報名ê時間，目前lóng 是線頂報名kap上課。重點是受訓liáu，ē 考筆試kap試教，筆試ê部份就是老師上課ê內容kap重點，基本上老師lóng ē kā 你提醒，試教ê部份tō愛家己seng 寫教案，你beh試教ê內容是啥，mā ē-sái 參考教科書ê教案落去編家己ê內容。
一般來講，筆試愛seng 考過，考過chiah ē-tàng 複試(試教ê部份)，nā 試教有通過，tō ē-tàng 正式the̍h-tio̍h 支援教師證，soah 落來tō 去你想欲教ê學校允頭路lo̍h!!
沒有留言:
張貼留言